February 13, 2013: Ginmur po:lo a:la
asinang okanodo:pé ésar sarradungai, pítír kurak la dungai daggabnam amo:dé.
Luki ésar sarra anné kaman ísíng amíng kídídém
moyo sula dung lambé kéra do írga:né lutadko bombi dungkunémpé. Singgi appun
punna lí:jík lí:jík pé appíloi ka:po la
dung. Koka dokkémpé tagad appun punamém
kabek tokuma émdaggom, silo-mélo tagad amingém bojéko ka:bekma. Lígang sém
borík supé okoiko pí:ram dagnémpé ila dungai.
Tako Gí:tu dok Mé:mipénam Dírbí Karé
Suk bírduk so ngo do:lupé gíkaku Ali-A:ye Lígang (AAL) kangkolo. Dítak kínít
ko ikangaboi ngok sí:sang ko do:ludo Lígang kangkima:namé. Tiket pa:ma:la
Guwahati Inter State Bus Terminus (ISBT) dokké Laimekuri pé Assam Valley baslo kebin ara:do tetmíndanna gíku. Okum érang tani odokké ajon-arum lédulo
gí:dí-sípí ém ka:pé émna toktoku IIT Guwahati dok mélík (leave) langge:la.
Rokom kínít anin ayirdo bas lokké gíy
danna ngo Tako Gí:tung LP school lotta do dírbí iko karéko ka:bekto.
Lígang longai odo, tetgéng (chair) ém bojéko pa:sala létak. Bagémpé méngkang,
“Arey, okai dírbí léngkan kane méyum? Okkan sé bulu, Lígang sé sémpéi ikangkun
su!”
Akula du:né poka lamtédok do:lupé alé daman
daman la gíku kabeknam karédo agom mé:mila. Lambédo ajon Natukali, Tanibhai
bulum ríksuto. Kangkinnam taniyém ríksunamdéméi
aidun-aiman émna tatbomla-tatbomla okumpé pí:toku.
Bulukangké Lígang Dumdum Manbonam Do:ying
 |
| Ngoluk do:lung so:man.... |
Longédo aso aso:pé tanyi yatkumsudu:bo
do:lung dírbí lottadop. Ya:me-mímbír, milo-yaméng, miné-míjíng géru-bomru sula
takam gíngab du:bo. Kajé irobla:boi émna sékai-sékai jé:bom du:bo, yummayiryé
sémpé il du:mílo, édílo soman-yirmanyén, édílo doman-tímanyén?
Dum dum lu:pi manrob la:boi émnamé, dum dum
mankin né tani kama, Líggod kapé iyén? Ya:me ko kídísok sékosinne dumdum
mankinné katoman émna sékai abín taniko sékomsin suttékmap apping tatdop
ge:dung. Mankinné ngoluk ta:to Digholangkésin alak ser dung, supak sék
manboyan?
Odo ayirdo Buluka émnam míjí dém sékai
mé:pa:to. Élo, Buluka bí Líga lo do:lu so lendagada, su okolan? Tatgonammé lubidak Lígang longé lok mé:panam
dum dum manjo:né ta:to Bulukabí ríkkong ké do:lung ko:lo manboka ro:do, odok
lédupé kekonké doludém manbola dung. Édém manaboge:la:pak ngoluk do:lupé gísa:yé.
Lunamí démpé lédupé bí gído, odokképak
dírbí lotta dé írgangkang.
Ko:ka dokkébo ka:tak Buluka ta:to bím, ru:be dak émna de:gé dolung
amme lukadak lékom lamté-béda:lo. Yamné kamang . Amilo pagbo kísapé gerra aíké
donamém bí la:len sudak. Émmum taniyé dítak dok angu longé kídído, émpigel bí
ma:mílo ngoluk mé:bomsunam dírbí tarungé ingabla:ma. Aro:pé mé:yém, réngam
ara:so Bulukang kémpin dírbí migang éddík du:song? Dumér ako sékai édílai tulík
kítan?
Oi ni:tom, lotta so:man élang baik pamsarnam!
Yumé ayirdo do:lung ajon lédulo ngo:sin
apong tínggo-dogo mannam taru do a:mínto. Do:lung ajon émyém yamné la:no ngébo
abayang, akelokké obo akosin idu:bo! Okumbomna dola du:bo ngok sí:sa jonsunamé
supak, lékom ngo okkom il dun émna mé:dak! Porila dungkolo sémpé idakbona
émna mé:yin sula du:doku!
Oi
ni:tom, kaban sékoi okkom pagdakji moset-moret bomdanna okum okum lo ír bola
dungai takamé, sékai odo ara:do modagai ngok tatkí ma:nam oi ko sémpé: O: bí
mé:nam do gíge:la, Bau bí mé:nam dém langge:la, kapila ngom lutum dun ngokké oi
mé la:pé mé:dosom, O:bí sí:sang ayir pangkar ma:némpé, Bau bí sí:sang ayir
gibadar kímanémpé...
Yirman-soman ara ngí:do ngokké Koton Kolej
do po:pé ké senior akolok phon angkang. Bi ngoluk do:lung kérangíng kolo dung
lotta soman ka:la,ngom ríksu:yé émdak. Facebook do AAL yalo update lok ngo gísa
dungku émnam kinla nombor dém amikolok magabgel phon dung émto. Oh! Technology lok tani okol duji édémsin an-gab
la:named vmmumémpé ikangku émnam dém aropé kinsék suto odo.
Ngolu ríksula kekonké do:lung do mibo ya:me
émsula ba:pi-bangok oi ni:tom moto. Koton Kolej dok hostel du:do dokkém ngolu mé:pa
langkula Disangmukhoi Ophola démsin paklíktoku!
Jonai
pé yumé do gísané senior annyi lédulo, lékop dulangkui émna. Junkaréng ruyi do baik pamsar kang kinso:map.
Tolopésin mo:tédak, bolopésin mo:tédak, NH 52 do ngolu kapiyen supak?
Beteri kéik la du:ne ngok mobail so ayir dém ka:toném 10.30 dakbo. Ajon-arum ém phone ila du:dom
Maruti 800 kar ako duksa:do, ngoluk lambé
ríson dok dakla du:nam dém ka:la sékai gari ara:dokké amin ako jénggel du:tet
kang. Ka:toném ngoluk ajon Dhononjoy Modi ké biro lok ajon appiko dung, bulusin
Silapothar bokké Lígang dogel gídungku. Gepla du:né gari ara:ngí:do ngolang
ajon ako dura mínto, Bhismo bí baik dém atér dé kapéi daggom dukbomyéku émnam
dém togésukang.
Yumédo Jonai dok Bhaskor Tayeng, odokké
ajon Mintu Régon annyi dé pongkokdokké dukríksula pí:toku. Ngasodlok pa:nam
dé:pak aro ajoné!
Ali-A:yé Lígang
Borík Yumdéng Agom
Jonai pé pí:salangkula Lí:sang do:lung
pí:né Bhismo ké rumdo:pé. Mimak moné ajon Mintu Régon mé ríksula Jonai modi dok ‘latest update’ tatka. AAL
soman-yirman mépakge:la ngolum gíríksukol gínamdém bí lugela sémpé gompir ékké
pirsarto. Mg. Régonbí suk dítak sokké anu dírlab ko la:len dung émnamdém
kinmoto.
Do:lung-lujar takamlo Ali-A:ye Lígang
boríksunam tarung ko igurbodung, okkon émtoném “Ali-A:ye Lígang Borík Yumdéng”
(AALBY) émtak. Yampo Lígang émdo yumédo réngamé (ya:me-mímbír!) AAL ém
ír-pongkír pé ager-atung gerla, gumrag soman-yirman, purang apin, ambuk atí-atí
amanla du:dope édé taru dé. Pagmílo karé mosa danna mojo-molabné ni:tom tuli
gokla AAL kangkanpé borík sudopé idung.
Mg. Régonké lubidak lédup kinsékto Tako
Gí:tung dok dírbí karédé oko légang motagaji! Takunammé ni:tom tuli Toraboti
Bori bí:lang Sorbeswor Kardong bí gídagai émdak méyum, kinnoyamílo kangkol gísangkupé
nammai! AAL borík yumédé éddíko ngoluk sí:sangém Oang Dírbí (Western Culture) mé:bonammém
motum layén édémpak mé:mipénamé, tatge:la mé:to.
Ayirdém ka:namé yumé 12 yébo. Aíké du:télop
ainé yumé émgel gípan sukuné.
No comments:
Post a Comment