» Kapila Bangalore bokké taniyé dukpakpé idungkun ?

Mass Exodus: Northeast Rush in Bangalore. Photo: AFP

Ngo August 14 ro yubkolokke darobla kumnam ni:tom ako tadla dungai, rokom 8 ka:ngaboi, do:nyi ngok dungko rumdo kanga:ladu:bo. Ngok cell phone sé bagémpé bé:sang kang, ka:namé Bengaluru ( Bangalore) bok du:né ajon Bongali bí. Phone dém torík sumadap méngkang kapé édílosin rokompé phone kíman amisé phone ikinkan? Luposula "ainé rokom'" émna aidun-aiman émnam do:yingko tatsa do:do méi bí lukang, atai do:ying ako kabomap taddumalalng, édé Assam mo:di kapéi idung émdakmalang, okkar dém émna tatto ném lukang "Sido ngolumsin gíkangku:bo émdumalang". Ngo taulat toném lukang, " Odo Boro-Muslim pa:mín sula ngolukodok éddík taniyé so du:ji 20 longé ara:do gípayeku émdak". Ngo tattoném kapil August 20 ara:do émdun...okkarla édémpé ludun.? Eid longé lédupé 'halat kharab hoga" émdak.

Porin ko kísapé mé:moko kala ngok ajon dém ngo luto, "Do:yidé arrolang atai, no sékkolok pa:dun, aiyop confirm po:to?". Ngok taunamdém lulat sukuma:pé pésonémpé lukang, "Amme one week lédudokkébo ticket ém langab to:bo. Ticket ma:lasin mélokébong pa:map idung, no okoi ko ibi la:yéne, ngo sido sílímang". Ngo bík sémpé lunam dém taddannai tatkinto:bo. Ngok ajjoulokkébo jonnam ajoné bí, arík ila, so:bo kanggab jonla sí:sa jonnam ajoné, jikong aríklo oi kabjon nam ta:niyé, ngo kindak okaiko anguru:pé ima:pé sokkídíko lagila rokompé bí phone ima. Bím ngo dítak takkéng (6 years) ko ka:ngkíkumanam idakbo, ngo édílokké Jonai mé:pakla porikolo gílenduji, odokkébong ríksoi kíkuma.....sémmopé phone lo luposumíndo, mo:tép du:né ajon akko dém kapé ajukala du:moyen! Ngolu Mising angé-bírrangésin deeko bolo ngasodla dag émda.....ngo kindak do:lulok sí:sa:né kísapé kapin ngasod a:la, éddík porige:la gídakji mo:téng amo:lo bottan ma:nyingém yékbomla...ajuka dung émye mílo mé:péi iyé.


Ngo do:yidém mé:mi ge:la bím asin kínggídop luto no mé:pénam kamang, ngolu sokké kapéi daggom gílangkunam dém ibiyé. Ngo ngoluk abín ami kídarém office gípíla email, phone ila bík lunam agom takam dém, ngasodém anpasuyenémpé idung émnamdém lubito. August 15 India sok 66na:né Independence longé ro:do lubidak ngolu siyum sa:len yeku...yu:mé ma:dapé bí dungko dokké ajon takam gílenyeku. Lédupé ticket émsin pa:tobo émna lubidak, ngo asinsé mé:po kang. Odokkésin lukang ngolu first train dém pa:mang, annyi ko special train bisettak..11.45 yumépé dukyé émdak. misingonline.com do ngo yumédo atto ta:niyé Bangalore station dé bingka:bo émna, Northeast sop gíkkopénné. Okolosin do:yidém nérkíkpé bima:da Hindustan Times dém mé:gela, édésin andongo:pé. Yumé 12 AM anin dokké ka:namé Facebook do do:yidém orbomdu:bo aso asopé. Twitter do ka:namé 'Bangalore" dé trending la dung Top 10 ara:do. Do:yidé odokké gusangkang......


Ka:pé yumé atérlo special train annyiko la:len layen Southwestern Railway yé, édílai bagémpé la:len kítaklang? Ngasodém anpa su:ma mílo tu édémpé yumé atér lo ilamang, Ngoluk réngam légang ager gerné kébang ami, Assam odokké Northeast sok migom amiyém sok légang ngolu aséngko bipaye.. Supak ipénamko du:daggom ima:bo, takamé amik miktar ka:bo! Amme okkoi aí émpésong mé:mipénamé. Lédupé émdaggom tauto atai do:lung gíladla supak okkom iyekun, ager ikko kamang! Bí lukang, "édémína mé:du:né, ager-asak no matokai odok". " No édém mé:yok no aiyop pí:potoku ajon", ngo luto. Mé:mi pénamé aro:pé éddíko ngoluk réngamé sé mo:lékso ngasodla turbek du:ji.